Rough last days


Han eigentlich kein neue Blog meh wellae schriibe - de geschtrig Tag isches aber wert. Sit meh als einere Wuche isch jetzt de Brendon da und mir haends wunderbar. Mached zaeme Yoga am Morge ufem Rooftop, bevor d'Sunne scho am 8i abebraennt. Aessed Idly und Masala Dosa, trinked frische Mangojuice und Chai ide Gasse und ziehnd zaeme dur Varanasi.
Nachdem ich jetzt scho 20 Taeg da ide Stadt bin, han ich extrem s'Beduerfniss uf Natur und frischi Luft gha und so haemmer Eus entschiede, miteme Motorbike zume Wasserfall-Badeplatz z'fahre, oepe 50 km vo da. Nach echli umefroege, haemmer en Israeli gfunde, wo Eus sini Endfield Bullet vermietet haet. Das isch DAS indische Kult-Bike, e grossi, Oldschool-Maschine, cool ussehend und luut. Nachere Testfahrt haet de Brendon sich defuer entschiede, will es isch noed so eifach, das Bike z'fahre. Oder bessergseit, es bruucht chli Fiingfuehl und Wuesse, wellae Hebel waenn wo bewegt werde muess.

So simmer daenn geschter Morge am 6i losgfahre, mitem Gedanke, irgendwo z'uebernachte und ersch am naechste Tag - also huet - wieder zrugg z'cho. Mir haend en erschte Zmorgestopp ade Strass mit feiner Lassi, Kichererbsecurry, Chapati und Sweets iigleit und haend daenn wellae wiiterfahre. De Brendon haet nachem 10. Versuech, s'bike ahz'lah langsam nueme so gluecklich usgseh und ich han noed vill choene mache, usser au probiere, aber han ja na vill weniger Chraft ide Bei. Natuerlich sind innerhalb vo 3 Minute 10 Maenner um Eus ume gstande und haend zuegluegt, was ihm sini Luune noed grad ghebt haet. Sie sind aber daenn ganz fruendlich gsi, haend alli wellae haelfe und alli umegheblet, aber ohni wuerkli z'wuesse, wies funktioniert. Bis daenn en juengere Typ cho isch, wo's gschafft haet, ahz'lah. Scho chli verschwitzt aber happy simmer daenn wiiterdueset, aber noed lang. D'Schaltig isch noed so eifach, dezue chunt die holperig Strass, Trucks, Velos, Ochsechaere, Huend und Chueh, wo Chruez und quer durespaziered, und mit all dem isch Euses Vehikel nach churzer Ziit scho wieder abgsoffe. Vorher na ufem relativ ahgnehme Marktplatz, dasmal am staubige, luute Strasserand. Au det simmer schnaell vo Luuet umgeh gsi, wo Eus haend wellae haelfe. Ganz lieb, aber es choschtet immer viel Nerve, will alli waend probiere und froeged, vo wo mier choemed und wie mier heissed und so wiiter. Dezue d'Hitz und all paar Sekunde en huupende Truck wo 2 Meter a Eus verbiigfahre isch, so luut, das me muess schreie zum sich verstah. Und das am Morge am 8i... Irgendwaenn isch daenn en Mechaniker cho, de haet eine vo dene Schluech is Muul gno, dra gsoge, bis Benzin usecho isch und haet daenn das Bike wieder zum laufe bracht. Guten Mutes simmer wiitergfahre, im Wuesse, dass mir bald muend go tanke, sprich, s'Bike wieder abstellae und wieder ahstellae... Mir haend daenn nach wieder ener Halbstund probiere ohni Erfolg eusem Vermieter wellae ahluete. Natuerlich haet genau daenn mis Phone de Geischt ufgeh, no more Battery! Zum Glueck haemmer es Telefon vo oeper anderem choene ha - d'Inder sind alli so hilfsbereit und haend au nie Gaeld fuer nuet wellae! - Er haet Eus aber noed vill choene haelfe, usser, dass er die Afangsschwierigkeite kaennt.
Mir haends daenn mit Hilf vo es paar Luuet s'bike ahgschobe, und, oh Wunder, es haet klappet! So simmer, natuerlich ohni ahzhalte bis zu Eusem Ziel braust. Det haemmer ime Chaishop zersch mal 3 Chai und zwei Liter Wasser abegleert, bevor mer daenn na ca. 3 km dur es ustroechnets Flusstal bis zume wunderschoene chline See cho sind. rundume hoechi Felse, Natur pur! Mir haends gnosse, obwohl mir daenn mitenand einigi Differenze gha haend... Aber das isch e anderi Gschicht. Es haet uf jede Fall zeigt, dass Varanasi e intensivi Stadt isch, vor allem bi 45 Grad, und mir sind Eus beidi noed gwoehnt, fasch 24 Stund mit oeperem zaema z'si. De Usflug haet daenn alli Emotione ufebracht, was mir daenn spoeter, wo mier zrugg bim Chaishop gsi sind und mit de Familie Sabchi, Chapati, Dal und Riis g'aesse haend, guet haend choene bespraeche.
Mir haend Eus daenn entschiede, dass mir zrugg uf Varanasi fahred, 50 km im Dunkle, was eigentlich noed sehr gschied isch uf indische Strasse. Aber de Brendon isch en guete Fahrer, sicher und vorsichtig zugliich und so hani mir s'Tuech um Muul und Nase ghuellt, d'Sunnebruelle ufgsetzt und mir haend ohni grossi Problem choene starte. Sogar fueren Mangojuice haets glanget ufem Waeg und mit Hilf vo Luuet haemers wider gschafft, wiiterz'cho. Ueber staubigi Strasse, a villne luechtende, hupende Trucks verbii haemmer vor de Stadt en letschtae Lassistop iigleiht. Und daenn das Bike eifach nueme choene starte! Mir haends zweimal de Huegel abegstosse, es Stueckli jsches gange, daenn wieder fertig. So haemmers mit Eusere letschtae Chraft ueber d'Brugg gstosse und vo det us Euse Vermieter um Hilf baete. Mir haend nueme moege, sind todmued, staubig verschwitzt und am Aendi vo Eusne Chraeft gsi. Dummerwiis haemmer gmerkt, wo d'Jungs scho ufem Waeg gsi sind, dass es dasmal am Benzin glaege isch... Na ja, sie haends mit Humor gno. Und mir sind nachere Duschi zimli schnaell ufem Dach iigschlafe.