Back in Züri

Und scho wieder dihei... Sit 6 Täg wieder im Alltag - miteme guete Start, sprich zwei Geburi Partys, liebe Fründe und Familie. Und doch wehr ich mich irgendwie degäge, mini Indiebilder loszlah... Einersiits bin ich jetzt wieder da und schätz au alles woni han und anderersiits wett ich das freie Gfühl, wo ich bim Reise han, nöd loslah. Es hät sich uf jede Fall öpis g'änderet, ich bin nüm so sesshaft wie au scho, würd am liebschte bald wieder abzottle. Und doch gnüüss ich natürlich au s'Vertraute, d'Lüüt um mich. Es wird sich jetzt sowieso vieles ändere, ich wird nüme voll bim clitcare debi sii, nur no als stili Teilhaberin, d'Sarina wirds wiiterfüehre und das sicher guet! Natürlich wird ich au Ferieverträtig mache, wänn sie wieder ide Wältgschicht umedüst. Ich starte jetzt mis eigene Projekt: premrachana.ch, das heisst soviel wie 'Love' und 'Creativity'. Wird mini Yogapage und gliichziitig wird ich det en Shop iirichte, wo's verschiedeni Sache z'chaufe git, alles hät irgendwie mit Spiritualität z'tue und isch nach Möglichkeit ökologisch und ethisch korrekt hergstellt. Es söll au e Plattform sii, zum sich ustuusche, zum Reise, Yoga, Meditation... Ja, und uf das freu mi! Und natürlich ufs Yoga unterrichte, ich wird abem Mentig, 10. Mai wieder uf de Josefswiese Outdoor-Yoga mache und bald au wieder en Ruum ha, für zuesätzlichi Stunde.

De Früehlig isch ja au da und Züri isch e schöni Stadt, also, kei Grund zum wehmüetig sii!!!